भक्तिविलास पोखरेल
गाईघाट, १९ वैशाख । एसईई परीक्षा दिएर बसेका विद्यार्थीहरूको समयलाई उपयोगी र उत्पादनमूलक बनाउने उद्देश्यले उदयपुरको चौदण्डीगढी नगरपालिकाको ४ नम्बर वडा कार्यालयले सूचना प्रविधिसम्बन्धि निःशुल्क कम्प्युटर तालिमको कक्षा सञ्चालन गरेको छ ।
वडा अध्यक्ष लुङ्गाराज राईका अनुसार अहिले सूचना प्रविधिको युग भएकाले विद्यार्थीहरूलाई प्रारम्भिक चरणमै कम्प्युटर शिक्षासँग जोड्न अति आवश्यक भएको विद्यार्थीहरूलाई भविष्यमा रोजगारीका अवसरसँग जोड्ने र उनीहरूको क्षमता अभिवृद्धि गर्ने लक्ष्यले तालिम सञ्चालन गरिएको हो ।
यस तालिमले विद्यार्थीहरूको प्रतिभा प्रस्फुटन गराउन र आत्मविश्वास बढाउन महत्वपूर्ण भूमिका खेल्ने अपेक्षा गरिएको छ । मुख्यतः वडा नम्बर ४ भित्रका एसईई दिएर बसेका विद्यार्थीलाई लक्षित गरेर सुरु गरिएको यो तालिममा अहिले अन्य वडाहरुका विद्यार्थीहरूको समेत सहभागिता रहेको छ ।
चौदण्डीगढी नगरपालिकाका नगर प्रमुख कालुमान लामाले आगामी दिनमा नगरभित्रका सम्पूर्ण विद्यार्थीका लागि डिप्लोमा तहसम्मकै कम्प्युटर शिक्षा निःशुल्क उपलब्ध गराउने योजना नगरले लिएको जानकारी दिनुभएको छ । अहिले प्रशिक्षण दिँदै आउनुएका प्रशिक्षकलाई नै करार सम्झौता गरी दीर्घकालीन रूपमा डिप्लोमा तह सम्मको कक्षा सञ्चालन गर्ने तयारी भइरहेको नगरप्रमुख लामाले बताउनुभयो ।
