त्रियुगा न्युज
गाईघाट साउन ५ । उदयपुरको गाईघाटमा शनिबार उदयपुर साहित्य कला प्रतिष्ठानले दुई पुस्तक विमोचन गर्नुका साथै चार जना स्रष्टालाई सम्मान गरेको छ । उदयपुर साहित्य कला प्रतिष्ठानको दोश्रो वार्षिक साधारणसभाका अवसरमा प्राज्ञ खेम नेपालीले उदयपुरका साहित्यकार उद्धव घिमिरेद्धारा लेखिएको महाकाव्य इतिहास भित्रको बर्तामान र चारजना स्रष्टाको संयुक्त प्रकाशन स्रष्टा सङ्गमको एकैसाख बिमोचन गर्नु भएको हो ।
सो अवसरमा प्राज्ञ खेम नेपालीेले उदयपुर साहित्य कला प्रतिष्ठानले गरेको यो कार्यक्रमबाट आफूले पनि शिक्षा पाएको र यो शिक्षालाई बिराटनगरमा पनि प्रयोग गर्न प्रयास गर्ने बताउनुभयो । उहानँले साहित्य लेख्दा जनतालाई, पिछडिएका वर्ग, समाजले हेलोहोचो गर्ने वर्गका बारेमा लेख्नु पर्ने र बिग्रेको राजनीतिलाई सपारेर मुलुकलाई नयाँ बाटोमा लैजान मार्ग निर्देश गरेर लेख्नु पर्ने बताउनुभयो ।
सो कार्यक्रममा झट्केलो छोरो उपन्यासका लेखक भिम बहादुर खत्री घाँसेलाई २०८० सालको शिवलोक स्मृति साहित्य पुरस्कारबाट सम्मानित गरिएको छ । घाँसेलाई दोसल्ला ओढाएर सम्मानपत्र सहित नगद रु दस हजार रासीको शिवलोक स्मृति साहित्य पुरस्कार सो अवसरमा प्रमुख अतिथि नेपाली र पुरस्कारदाता परिवारका तर्फमा शिव कुमारी पोखरेलले संयुक्त रुपमा प्रदान गर्नुभएको हो । यसैगरी राष्ट्रिय कविता महोत्सव २०८० मा उत्कृष्ट दसौ स्थानभित्र पर्न सफल कवि जीवन आरोही, द पोयट आइडलको दसौँ स्थानसम्म पुगन सफल भएका ऋषि बहादुर राई, र विश्वव्यापी खुला गजल प्रतियोगितामा प्रथम स्थान हासिल गर्न सफल सुमी पोखरेललाई उदयपुर साहित्य कला प्रतिष्ठानले दोसल्ला ओढाएर सम्मानपत्र सहित शनिवार सम्मान गरेको छ ।
सो अवसरका बिराटनगरका युवा कवि प्रिन्स प्रमोद ढकाल, इनरुवाका गजलकार किशोर कोइराला, सम्मानित स्रष्टाहरु सुमी पोखरेल, जीवन आरोही लगायतका कवि गजलकारहरुले रचना वाचन गर्नुभएकोथियो । उक्त कार्यक्रममा उदयपुरका अग्रज साहित्यकार एवमं राजनितिज्ञ राममणी पोखरेल, माहाकाव्यका लेखक उद्धव घिमिरे, साहित्यकार पुण्य कार्की ,साहित्यकार हरिशरण खतिवडा लगायतका वक्ताहरुले शुभकामना मन्तथव्यका साथै विमोचित महाकाव्यको र स्रष्टा सङ्गमको समीक्षा प्रस्तुत गर्नुभएकोथियो ।
उदयपुर साहित्य कला प्रतिष्ठानका अध्यक्ष डा. कैलाश कुमार राईको अध्यक्षतामा भएको सो कार्यक्रममा उपाध्यक्ष बासुदेव पोखरेलले स्वागत मन्तव्य दिनु भएको थियो भने महासचिव माधव पोखरेल गोज्याङ्ग्रेले सांगठनिक प्रतिवेदन र कोषाध्यक्ष महेन्द्र कुमार राईले आर्थिक प्रतिवेदन समेत प्रस्तुत गर्नु भएकोथियो । साधारणसभामा उदयपुर साहित्य कला प्रतिष्ठानको विधान संशोधन गर्ने प्रस्ताव सर्वसम्मत रुपले पास भएको उपाध्यक्ष बासुदेव पोखरेलले जानकारी दिनुभयो ।